Overblog
Editer l'article Suivre ce blog Administration + Créer mon blog

Publié par Karim Kherbouche

300110_164309853654821_164309440321529_340114_1287536202_n.jpgUssan iɛeddan, yuzen-d awal aneggaru (?) deg facebook, yenna-d : “Tamaziɣt, tamaziɣt, tamaziɣt, ay imdukkal !”, rriɣ-as-n s uqesser, s uɛekki : “Adrim, adrim, adrim…”, ziɣen netta yuḍen, rruḥ-is yessalqaf, ur ẓriɣ ara. Nettemlil tikwal deg facebook, nettmeslay, nettqessir, nettemcawar, yezga yesteqsa-yi-d “Amek ara as-nsemmi i X (s tefransist)?” , tikwal ttafeɣ-d, tikwal ulac, qqareɣ-as “Ad xemmemeɣ”. Tineggura-ya, acḥal aya ur i-iban, uriɣ-as izen, ur y-in-yerra ara, ɣileɣ ahat d ddunit i t-yeṭṭfen kan, d ulaqrar ad yi-d-yerr. Ulac !
Nur ur t-ssineɣ ara uqbel 1995 ; deg yulyu akked d ɣuct, nemlal deg « la cité universitaire garçons » n Ben Aknoun ; nekki d aselmad, netta d anelmad. Asmi i yekfa useggas n 194/95, aseggas n uɣunzu n lakul n tmurt n Lezzayer, yiwen n yijifer n MCB, yemtawa akked udabu n Lezzayer, sulin-d HCA deg yibrir. Mi mcawaren yiɛeggalen n Useqqamu Unnig n Timmuzɣa, dɣa mwatan akken ad gen tannant deg unebdu, ad d-suffɣen iselmaden imezwura ara yeldin tiwwura i unekcum n tmaziɣt deg uɣerbaz n Lezzayer.
Dɣa deg taggara n yunyu, nemlal di Ben Aknoun. Ass n lǧemɛa tameddit, ttawḍen-d yinelmaden, akked d iselmaden, yal wa ansa i d-yusa. Tuget si Tmurt n Leqbayel (Tizi Wezzu, Bgayet, Tubiret, Bumerdas, Sṭif) i d-rzan, ad ilin ma yella drus azal n 100 ; seg Waɣlan, ussan-d gar 10 akked 15 ; seg Wawras ad ilin azal n 15 ar 20 ; seg tmurt n Yumuhaɣ, zad ilin, ma yella aṭa, 10. Iɛeggalen icawiyen deg HCA, cfiɣ yeffeɣ-iten, leɛqel : ulac aṭas i d-yusan seg Wawras. Deg lawan-nni, “taluft n tmaziɣt” teččur d tasertit, riɣ ad d-iniɣ tuɣal d tasertit akkit. Ihi akken walan ulac Icawiyen, d Izwawen i yellan ugar, dɣa ruḥen yimḍebren-nni icawiyen deg HCA ɣer yiwen n tsandikit n yinelmaden(UNEA), kra win ufan din seg Wawras, wwin-t-id, akken kan amḍan n Yizwawen ur yettɛeddin at Wawras. Fiḥel ma nenna-d belli wid i-yusan si Tmurt, taqcict aqcic, d imeɣnasen s umata, d imekkiyen deg tdukkliwin tidselsanin ; d anemgal, wid I d-yusan seg Wawras, s umata, ur d-cliɛen ara akkit d tmaziɣt. Truḥ-aɣ nufa-tt !
Asmi i tebda tannant, imḍebren n HCA ssulin tineɣriyin ilmend n tantaliwin : taqbaylit, tacawit, tumẓabt akked tmaheɣt. Ihi taqbaylit llan snat n tneɣriyin, yiwet ṭṭfeɣ-tt nekki, tis snat yeṭṭef-itt Mass Rabehi. Nur Yeɣli-d deg tneɣrit-iw. Nxeddem am yikundaliyen : tasebḥit, seg 8/9 t ar 12 t, taneddit seg 1/14 t ar 17 t. Sugnet-d amek gant tagnatin ideg nqeddec : azɣal rnu aldun akked lbumbat iwimi nsell yal tikelt. Deg wacu i cfiɣ ɣef Nur imir-nni ? Cfiɣ kan yeqqar-d, s leḥya, s ucmumeḥ, s wawal lɛali : “Acimi mačči s tmaziɣt i nesselmad?”. Yesɛa lḥeqq, rnu ula d nekki fkiɣ-as lḥeqq imir-nni. Maca deg tallit-nni, ur nessin ara, ur nezmir ara, d ayen nessen kan i nesselmad. Nekki, imren, fkiɣ lmajister-inu, maca werɛad i as-giɣ tasalelt (soutenance). Taɣuri-ynu giɣ-tt s tefransist ! Maca ɣas akken, ttaruɣ tamaziɣt-taqbaylit am wass-a, rnu Tajerrumt n tmaziɣt, ssneɣ-tt am lǧib-iw. Aṭas n yinelmaden iɣef cfiɣ : Nur, amdakkel-is Mourad, Tameṭṭut-is Samia, Nacira…
Aseggas i d-yusan, tella-d tannant tis snat, deg unebdu n 1996, nemlal-d daɣen deg yiwet n tesnawit, deg Kouba. Aseggas-nni d Taɣlift n Usegmi (MEN) i d-tt-id-yessudsen. i d-yefkan tadrimt i usuddes n temlilit. Deg 1995, Taɣlift-a (MEN) tugi ad txelles, tugi ad d-tger iman-is ; qqaren-d ula d aɣlif n lawan yekreh tamaziɣt, yugi akk ad yesteɛref yes-s, ɣas akken HCA d tasuddut yellan seddaw n Tiselweyt nTegduda. Yella wayen nezmer ade d-nales ɣef tmental n snat n tannanin-a.
Llant temliliyin-nniḍen ideg nettemlil, meḥsub yal aseggas, akked d iselmaden i d-"nessufeɣ" deg 1995. Cfiɣ xersum ɣef tin n 1999 deg tesnawit n Iḥeddaden, deg Bgayet. Cfiɣ ɣef Samia, tameṭṭut n Nur (imi werɛad gin axxam), i yi-d-yesmesktayen yal tikelt ɣef wass n umulli-ynu, ass n 25 deg ɣuct. Cfiɣ ɣef Nur d umdakkel-is, Murad, i d-yesrusun lehna, talwit gar yinelmaden, ticki d-yella ccwal gar-asen ; cfiɣ ɣef Nacéra i d-yettakken "l'ambiance", cfiɣ ɣef waṭas, mačči d yiwen ad t-id-bedreɣ.

Yiwet gar temsirin n tmaziɣt n Nour Ould Amara

Deg Lpari, deg useggas n 2002, cfiɣ d nutni i yi-iselken, asmi xussen deg udrim. Asmi i ruḥeɣ ad “sutenniɣ” dukṭura-inu deg l’Inalco, deg jember 2003, tusa-d Samia tewwi-d lkamira, tsewwer tasalelt-iw, Nur ur d-yusi ara ass-nni, maca yezmer lḥal ur yestufa ara kan. Mi nerna kra n wussan, ɛerḍen-yi, Nur akked Samia, s axxam-nsen, nečča imekli lwaḥid ; syinna, nɛedda ɣer BRTV, yessasen-yi i wid ixeddmen dinna, s anda i i ɛedda, ad asen-yini s tfenṭazit “ Hat Docteur Bouamara …”, ḥulfaɣ yefreḥ yes-i, yefreḥ s wayen xedmeɣ. Mi tekfa tsalelt, yusa-d Mass Kati, ibubb-d lkamira n BRTV, yebɣa ad iyi-yeg tadiwennit. Dɣa d Mass Ziani, i d-yufa lḥal di Lpari, i yeṭṭfen asawaḍ, i yi-d-yettaken isteqsiyen. Llan yimdukkal, am Allawa Kherrib, Mouloud Kourdache, … Mi d-uɣaleɣ si Fransa, yiwen n wass, yessawel-d gma-tneɣ Abdenour Abdeslam, mi iwala tadiwennit i yi-texdem BRTV, yenna-yi-d “Ayen din i ferḥeɣ s wayen i txedmeḍ…Ferḥeɣ daɣen aṭas aṭas mi d-temmeslayeḍ s teqbaylit !”

Deg useggas n 2010, ttwaɛeḍeɣ, teɛreḍ yiwen n tidukkla n Fransa Coup de soleil ; amaẓrag-iw, Brahim Taẓaɣert, ira ad ruḥeɣ ɣer “rreḥba n udlis n Tmazɣa”, ad iliɣ din d imsiwel ɣef udlis n tmaziɣt. Ur ruḥeɣ ara, acku ur d-wjiden ara lekwaɣeḍ-iw, maca Nur, Samia akked yimdukkal-nniḍen, slan mi d-sawlen ɣef yisem-iw, ttrajun-iyi melmi ara d-baneɣ, ttrajun-iyi am wayyur n lɛid …Ulac-iyi !
Asmi d-yeffeɣ Issin, yessawel i at BRTV, yenna-yasen : “Ilaq ad mmeslayem ɣef usegzawal-a !” ; ɣer taggara n useggas n 2010, giɣ -d asenfar, bɣiɣ as ruḥeɣ ɣer Fransa : Samia akked Nur reggmen-iyi snat n tedwilin deg BRTV ; ɣas akken ur ruḥeɣ ara, wwten akken ad d-gemren idrimen i usnerni n ISSIN, acku nniɣ-asen llan wuguren akken ad d-afeɣ, di yal tamnaṭ n Tmurt n Leqbayel, win ara yi-d-yawin isallen ɣef teqbaylit ; reggmen-yi ad yi-ɛiwnen, taggara gan ayen iwumi zemren. 
Twalaḍ, a Nur ! Ulamek ara k-nettu, ulamek ara amneɣ temmuteḍ. Ayen i d-tenniḍ, ayen tgiḍ ara k-yeǧǧen teddreḍ deg wulawen-nneɣ, qim di talwit ihi, a Nur ay aḥbib !


Bgayet, ctember 2011
Kamal BOUAMARA

Pour être informé des derniers articles, inscrivez vous :
Commenter cet article

niko 23/10/2011 20:48



Bonsoir,


Passionné par le hockey depuis ma venue dans la belle province en 2010 je viens aujourd'hui sur votre site vous proposer une création personnelle du jeune et talentueux gardien de but des
Canadiens de Montréal Carey Price / http://www.nicolaslizier.com/article-creation-hockey-sur-glace-carey-price-87043839.html


Une affiche qui clos en beauté cette série qui en contient sept.
Je vous invite à me dire ce que vous en pensez, cela m'intéresse d'avoir votre avis !


Merci à vous je vous souhaite une bonne continuation sur votre blog.


A bientôt
Nicolas



niko 17/10/2011 18:57



Bonjour,


Un petite visite sur vos pages !
Passionné par le hockey j'aimerai vous proposer de découvrir cette récente création sur ce thème :


http://www.nicolaslizier.com/article-creation-hockey-sur-glace-joe-thornton-86559318.html


J'ai découvert réellement ce sport lors de mon séjour au Canada aujourd'hui je souhaite vous faire partager cette créa. Donner moi votre avis ça m'intéresse de connaître votre impression sur ce
sport roi au Canada !


Merci à vous à bientôt


Nicolas



tn pas cher 25/09/2011 03:08